شــــــــعور ســـخــــيف

**M E R O 0 O 0** · 07-29-2010, 07:41 PM

قصيده جحا

الكاتب : هشام الجخ

شعور سخيف
إنك تحس بإن وطنك شيء ضعيف
صوتك ضعيف
رأيك ضعيف
إنك تبيع قلبك وجسمك
وإنك تبيع قلمك وإسمك
ما يجيبوش حق الرغيف
سألوا جحا عن سر ضحكه
قالك أصل اتنين وشبكو اللى كان من تحت ميت واللى كان من فوق كفيف
دا شعور سخيف
وشعور سخيف
إنك تكون رمز الشحاتة
تبنى مبنى للشحاتة
تعمل وزراة للشحاتة
يا ساقية دورى
عدى فوقى ودوسى
نصبوا عليا وشحتونى فلوسى
ربطونى فيكى .. حتى ما اتغميت
هما اللى فرحوا ووحدى أنا اتغميت
أنا اللى صاحب البيت عايش بدون لازمة ولما مرة شكيت إدونى بالجزمة
مش لاقى تطفح اديك
هاتولنا وجبولنا وادونا ودولنا
هنجيب منين نديك
طافح يابلدى غدايا
ولوعتى غدايا
وادىالاحبه التقى عدايا

أنا اللى زارعك دهب بتأكلينى سباخ
إن كان دة تقل ودلع بزيادة دلعك باخ
لا شفت فيكى هنا ولا شفت فيكى ترف
كل اللى فيكى قرف
كرامتنا متهانة
واللقمة بإهانة
بتخلفينا ليه لما انتى كارهانا
يعنى ايه تبقى إنتى هبة النيل يا مزة
وكل يوم المية تقطع
يعنى ايه لما اشتكى غلو الفاتورة
يقولو تشكى بس تدفع
لما قش الرز ثروة بتتحرق
وأما نفط الأمة ثروة بتتسرق
وأما جلادك على ولادك بيبطش
وأما علمك ما يلاقيش يآكل فيطفش
يعنى ايه نرفع ايدينا بالسلام لجل الغزاة
ويعنى ايه لما ابقى ماشى فى حالى اتشد اشتباه
يعنى ايه لما اتحبس أربع سنين حبس احتياطى حبس اعتباطى
يعنى ايه مش حاسة بالعمر وغلاوته
بتصبى مر العمر ليه
دة انا كنت ح اوهب لك حلاوته
أنا عمرى ما أتأمرت
ولا حطيت شروطى
ومكان ما ترسى مركبك بابنى شطوطى
ا نا كنت جيشك لما مماليلك باعوكى
وكنت يوسف لما عشتى سنين عجاف
وضلوعى دى اللى فى معركة قادش حموكى
وشفايفى دى اللى ما بطلتش فى يوم هتاف
دة انا كل شبر فى أرضك اتمرمغت فيه
وكل يوم عشتيه أنا اتغذبت بيه
بتكرهينى عيونك السودة وأيامى اللى فاتت
مانتيش حبيبيتى من النهاردة
حبيبتى ماتت
علا صوت أدانك جرس فى الشدة صاحينلك
من امتى كانوا الحرس هما اللى باقينلك
بعتينى علشانهم وعنيكى معصوبة
ياهلترى خاينة ولا زيى مغصوبة
كل الكلام اتقال والشعر بقى ماسخ
والصبر علو جبال والظلم شىء راسخ
وطن وغرقان فى النطاعة
كل شىء ريحته نطاعة
علمونا بالعصاية ورضعونا الخوف رضاعة
علمونا فى المدارس يعنى ايه كلمة قيام
علمونا نخاف من الناظر فيتمنع الكلام
علمونا ازاى نخاف وازاى نكش بس نسيوا يعلمونا الاحترام
فمتزعلوش لما ابقى مش باسمع كلامكم
وماتزعلوش لما ابقى خارج عن النظام
مستنى ايه من طفل ربوه بالزعاق؟
غير المشاكل والخناق
كل اللى بيقولك بحبك دول نفاق
أنا لما قلت لك بحبك كان نفاق
الحب يعنى اتين بيدوا
مش ايد بتبنى وستميت تيت تيت يهدو
الحب حالة الحب مش شعر وقوالة
الحب يعنى براح فى قلب العاشقين للمعشوقين
يعنى الغلابة يناموا فى الليل دفيانين
الحب يعنى جواب لكل المسجونين هما ليه بقوا مسجونين
يعنى أعيش علشان هدف علشان رسالة
يعنى احس بقيمتى فيكى
إنى مش عايش عوالة
يعنى لما اعرق تكافئيى بعدالة
الحب حالة الحب مش شعر وقوالة
الحب حاجة ما تتوجدش فى وسط ناس بتجيب غداها من صناديق الزبالة
بارت مراعينا
والبئر قد جفَ
والجوع يكوينا
والصبر ما كّفى
والقلب لا يهدا
والجرح لا يشفى
ولأننا طوع زنا لهم خفا
جاءوا بموكبهم
واشتغلت الزفة
الدفة مظبوطة وأصلا مافيش دفة
والكفة مش مايلة علشان مافيش كفة
و جحا اللى جاى بالليل
لساه بيتخفى
شايف ديدان الغيط
سارحة ومارحماشى
من جبنه شاف الدود سابه وراح ماشى
ولا اتكسف للناس ولا حس على طوله
الناس عشمها كبير جريوا بيشكوله
ضحك جحا ضحكة مواشى
مادام بعيد عن طينى ... ماشى
الدود قاعد لك يا جحا ولابد فى طينك
بعد ما يمص فى دمانا مش حيحلاله الا طينك
احنا اهلك احنا رجالتك أمانك
إحنا وقت الشدة سندك إحنا زادك
يا جحا احمى ولادك
لو كنت عايز تحمى طينك
سوف أرحل ربما يلقانى من ارجو لقاه
هامشى ويا الشحاتين وابكى على حلمى اللى تاه
بس مش هاشحت رغيف
هاشحت وطن لله

**منى المسلمه** · 07-30-2010, 03:10 PM

الله ...الله ...الله

**copacapana** · 07-30-2010, 03:30 PM

القصيدة دى عجبتنى اوى
لأنى لسة حاضرها من يومين فى العاشرة مساءا
على قناة دريم
وهو بصراحة عليه طريقة القاء تشد اى حد من ساعة ما يبدأ
ولغاية ما يخلص
الواحد يفضل مبرق عنيه معاه :

dr_elhoseiny · 07-30-2010, 03:53 PM

كلام رائع
ويعكس بالفعل الحاله اللى احنا عايشينها

**M E R O 0 O 0** · 07-30-2010, 03:55 PM

اقتباس:

منى المسلمه

الله ...الله ...الله

يا اهلا بشاعره المنتدى
بس فعلا انا كمان اول ماسمعتها عجبتني جدااا

اقتباس:

copacapana القصيدة دى عجبتنى اوى
لأنى لسة حاضرها من يومين فى العاشرة مساءا
على قناة دريم
وهو بصراحة عليه طريقة القاء تشد اى حد من ساعة ما يبدأ
ولغاية ما يخلص
الواحد يفضل مبرق عنيه معاه :

يا اهلا ياد-احمد
اها انا سمعتها بردو في العاشره مساء
علشان كده دورت عليها في النت
وكان نفسي اعرف انزل اليوتيوب معها بس معرفتش انزلها
بس فعلا القائه للشعر رائع

**M E R O 0 O 0** · 07-30-2010, 03:58 PM

اقتباس:

المشاركة الأصلية كتبت بواسطة على باب الله

كلام رائع
ويعكس بالفعل الحاله اللى احنا عايشينها

فعلا يادكتور الشعر ده هو حالنا دلوقتي

فقيرة الى الله · 07-30-2010, 04:37 PM

اقتباس:

المشاركة الأصلية كتبت بواسطة m e r o 0 o 0

يا اهلا بشاعره المنتدى
بس فعلا انا كمان اول ماسمعتها عجبتني جدااا

يا اهلا ياد-احمد
اها انا سمعتها بردو في العاشره مساء
علشان كده دورت عليها في النت
وكان نفسي اعرف انزل اليوتيوب معها بس معرفتش انزلها
بس فعلا القائه للشعر رائع

قصيدة فعلا روعة يا دكتورة
ياريت تحطيلى الينك بتاعها ع اليو تيوب

محمد قاسم · 07-30-2010, 05:28 PM

فعلاً قصيدة رائعة ومؤلمة
الراجل ده انا باحترمه جداً
وأول قصيدة اسمعها له كان إسمها
" تلات خرفان"
وكانت برده مؤلمة

**M E R O 0 O 0** · 07-30-2010, 05:36 PM

اقتباس:

قصيدة فعلا روعة يا دكتورة
ياريت تحطيلى الينك بتاعها ع اليو تيوب

فعلا القصيده رائعه جدا

الحمد الله الد-محمد نزل اليوتيوب

اقتباس:

محمد قاسم

فعلاً قصيدة رائعة ومؤلمة
الراجل ده انا باحترمه جداً
وأول قصيدة اسمعها له كان إسمها
" تلات خرفان"
وكانت برده مؤلمة

تسلم ياد-محمد على اليوتيوب
وفعلا هو شخصيه تستحق الاحترام

وشكرا جزيلا لكم

DR/sayed milanoo · 07-30-2010, 06:03 PM

الراجل ده شكله حساس اوى

كان هيخلينى اعيط

جزاكى الله خيرا ياميرووووو على التلميح

للقصيده الجميله دى

حد يبعتها للريس ياجماعه

علشان يحسوا بينا

ابو بكر · 07-30-2010, 06:45 PM

وربنا راجل جامد انا كنت مفكر ان انا لوحدي اللي حاسس بعدم انتماء لقيت ناس كتير زي

البلد مبقاش فيها شئ عدل ريحتها كلها h2s ريحة نطاعة مبقتش بلدنا دي بقت بلد ولاد التيييييييييت

اللي ربنا ياخدهم انا واحد من الناس اللي لو قامت حرب عمري ما هرفع سلاح اللي متنعمين في خيرها يبقوا يروحوا يدافعوا عنها بلد قرف بنت قرف علي رأي الراجل

**M E R O 0 O 0** · 07-31-2010, 10:35 AM

اقتباس:

DR/sayed milanoo الراجل ده شكله حساس اوى

كان هيخلينى اعيط

يا اهلا ياد- سيد
وفعلا هو شخصيه حساسه ومحترمه

اقتباس:

جزاكى الله خيرا ياميرووووو على التلميح

للقصيده الجميله دى

وجزاك الله بمثله
وتسلم يارب

اقتباس:

حد يبعتها للريس ياجماعه

علشان يحسوا بينا

اعتقد انه سمعها اصلها مش اول قصيده تنزل للمصر
بس هي المشكله في انه يسمعها ولا لاء
المشكله انه ياترى عامل حساب يوم السؤال

**M E R O 0 O 0** · 07-31-2010, 10:40 AM

اقتباس:

ابو بكر
وربنا راجل جامد انا كنت مفكر ان انا لوحدي اللي حاسس بعدم انتماء لقيت ناس كتير زي

البلد مبقاش فيها شئ عدل ريحتها كلها h2s ريحة نطاعة مبقتش بلدنا دي بقت بلد ولاد التيييييييييت

اللي ربنا ياخدهم انا واحد من الناس اللي لو قامت حرب عمري ما هرفع سلاح اللي متنعمين في خيرها يبقوا يروحوا يدافعوا عنها بلد قرف بنت قرف علي رأي الراجل

يا اهلا ياد- محمود

اكيد في كتير زيك بعد اخر احداث

ربنا يرحمنا برحمته

radwa_kamal · 07-31-2010, 12:41 PM

القصيدة حلوة اوووووووي

البلد حالها زي ماوصف بس برضو
مصر هتفضل مصر
ام الدنيا
مش ذنبها اللي بيحصل فيها هيا مجني عليها زي شعبها

**M E R O 0 O 0** · 08-01-2010, 12:46 PM

اقتباس:

المشاركة الأصلية كتبت بواسطة radwa_kamal

القصيدة حلوة اوووووووي

البلد حالها زي ماوصف بس برضو
مصر هتفضل مصر
ام الدنيا
مش ذنبها اللي بيحصل فيها هيا مجني عليها زي شعبها

اهلا د- رضوى
وفعلا مصر مش ذنبها الي بيحصل فيها
بس الحا ل فيها بقى صعب جدا

اي حد اول تفكير ليه انه عاوز يســـــافر

ويـــــــــــــــــــــــــارب يصلح الحال

القلب الملثم · 08-01-2010, 03:52 PM

القصيدة وطريقة الالقاء كله روعة
اختيار جميل د/ميرو سلمت يداك

**M E R O 0 O 0** · 08-02-2010, 03:28 AM

اقتباس:

المشاركة الأصلية كتبت بواسطة القلب الملثم

القصيدة وطريقة الالقاء كله روعة
اختيار جميل د/ميرو سلمت يداك

يا اهلا يا اهلا
منوره الموضوع
وتسلمي يارب

أدوات الموضوع
عرض نسخة صالحة للطباعة أرسل هذا الموضوع إلى صديق
طرق مشاهدة الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)