بسم الله الرحمن الرحيم
تنبيه : هذه مشاركة مطولة ، يرجى التفرغ لقراءتها بعناية ، فمن كان له عمل آخر فليؤجل قراءتها حتى يجد من نفسه حضورا وتفرغا ، ومن كان لا يحب قراءة المشاركات الطويلة فليقرأها على عدة أيام أو أقسام .
ولكن لا تقرأ هذه المشاركة حتى يجتمع لك عقلك وتحضر نفسك ويصفو ذهنك .
استعنت بالله
تشكى الكثيرون من الإحباط ، سواءا في المنتدى أو في الحياة ، قرأت مواضيعا كتبها أصحابها بنوايا حسنة ، ولكن طريقة عرضها وبثها تمت وتتم بترددات سلبية ، ما فيش حد مقتنع بالكلام ، التنمية والتطوير مجرد تخدير وقتي ، بياعين كلام ، ما فيش نتائج ، قل ما يحلو لك ، لا يهمني أن تقتنع أو لا تقتنع ، فتلك خياراتك ، ولكني بما سيوفقني الله لقوله أقيم الحجة عليك ، اللهم إني قد بلغت ، اللهم فاشهد ، قد لا تقتنع الآن ، لا مشكلة لدي ، ربما تدرك يوما أنك كنت مخطئا.
دائما ما كنت أقترح أن تبدأ خطواتك بتحديد موقفك الآن ، وسأفعل بإذن الله ، لو نزل ملك من السماء الآن موكل بتحقيق كل ما تريد ، وقال لك : اطلب وطلبك مستجاب ، ولكن كن محددا ، فماذا ستجيبه ؟؟؟؟؟
ما إنتش عارف إنت عايز إيه ، الملك هنا هيعملك إيه ؟؟؟؟
إذا كنت إنت صاحب الشأن مش عارف مين غيرك هيعرف؟؟؟؟
ارجع للقرآن
وإذا سألك عبادي عني فإني قريب أجيب دعوة الداع إذا دعان
كلنا عارفينها ، صح ؟؟؟؟؟
خلاصتها في كلمتين
قريب أجيب
فيه شرط
إذا دعان
ربنا قريب ويجيب بس الشرط لم يتحقق وهو إذا دعان
يبقى إنسى يا عمرو
ده أول خطأ أنت واقع فيه ، لازم تصححه.
دعونا ولم نجد إجابة
فيه هيئة مطلوبة وهي
سلوا الله وأنتم موقنون بالإجابة
صحيح بتدعي بس عندك شك في الإجابة أو خوف من عدم القبول
النتيجة : إنسى يا عمرو
الله لا يختبر
كل دعاء مستجاب ، إذا نكثر ، الله أكثر
-----------------------------------------------------------------
أنت الآن تخرجت من كلية الصيدلة أو طالب في كلية الصيدلة
ألم يكن ذلك حلم لك يوما فتحقق ؟؟
ما كنتش عاوز صيدلة ، ماشي ياسيدي ولا تزعل
ما عندكش نعمة كنت بتتمناها في يوم وهي عندك الآن ؟
أكيد فيه
تعالى نرجع بالزمن للوراء أو للماضي
عاوزك تراجع مسلسل الأحداث وتفتكر كل مشاعرك وكل ما حدث لك من قبل من لحظة تمني الأمنية التي تمنيتها وحتى حصولك عليها ، أكيد قابلتك عراقيل ، أكيد حسيت كتير إن اللي عاوزه ممكن يكون حلم صعب المنال ، بس أهو متحقق بين إيديك .
دلوقت عندك هدف واضح أو أمنية محددة ، حاليا مش عندك ، السؤال هو هل ممكن تتحقق كما تحقق غيرها ؟؟؟؟
لا تستطيع الجزم
ماشي كلام حلو
هل ما تريده هو نية أم تمني ؟؟
يعني مثلا عاوز سيارة
فماذا تقول لنفسك ؟؟؟
نفسي يكون عندي سيارة
أم
نويت إن شاء الله أن تكون عندي سيارة ؟؟؟
لو بتقول نفسي وأتمنى يبقى النتيجة
إنسى يا عمرو
وما نيل المطالب بالتمني ولكن تؤخذ الدنيا غلابا
ما تتمناش ، بل إنوي
معلش أنا عارف اللي بأكتبه غلط من الناحية الصرفية بس علشان الناس تعرف تقرأ وتفهم
طيب لو نويت إني أحصل على سيارة
النية بيستتبعها عمل
تشوف معاك فلوس قد إيه ، بتنزل السوق بتتفرج على الأنواع ، الأسعار ، طرق السداد ، كاش أم تقسيط
ما معاييش ما يكفي
النية موجودة
الحل ؟؟؟؟؟
سأوفر ثمنها
منين ؟؟؟؟
دخلي كذا وبأصرف كذا وممكن أحوش كذا
الوقت المحتاج له كذا علشان أجيب السيارة دي
طيب لو حوشت واستمريت هتشتريها وإلا لأ ؟؟؟
هأشتريها
النتيجة :
اللي نويته وتحركت نحوه حصل
-----------------------------------------------------
المستخلص :
بمجرد تحديدك للهدف ففيه بينك وبينه مسافة
السؤال حين تبدأ في أول خطوة نحو الهدف
من منكما يتحرك نحو الآخر ، أنت أم الهدف ؟؟؟
الإجابة :
كلاكما يتحرك نحو الآخر
عاوز تحصل على الهدف أسرع ؟
زود سرعتك نحوه ، فيزيد من سرعته نحوك
-----------------------------------------------------
ما هو الخطأ المحتمل ؟؟؟؟
الهدف الذي تم تحديده خطأ ؟
الدليل :
حصلت على السيارة بس مش حاسس لها بقيمة ولا أحس أني أحرزت إنجازا من أصله
السبب :
أنا كنت عاوز سيارة علشان زملائي عندهم سيارة ولم تكن السيارة هي الهدف لعينه
النتيجة :
طاقة مهدورة ، وقت ضائع ، عدم شعور بالرضا حتى بعد تحقيق الهدف
الحل :
حدد هدفك بالطريقة الصحيحة لأن اللي هتطلبه هيجي ، يبقى
لازم ينطلب صح
لا تقل اللهم صبرنا على ما ابتليتنا
لأن ما طلبته ستحصل عليه
وإنت طلبت الصبر
الأصح أن تقول :
اللهم ارفع عنا البلاء
خلاص اللي طلبته هيجي
اترفع البلاء والحمد لله
------------------------------------------------------------
المستخلص :
اللي هتطلبه هيحصلك
فاطلب صح من الأول
------------------------------------------------------------
ده كلام ما فيش فيه أي تنظير ولا غيره ، وكلها حاجات بتعملوها كل يوم وأنا بأستشهد بالواقع اللي عايشينه
لما بتعوز قميص ، فستان ، تلاجة ، غسالة
ما حدش بيغلبك واللي عاوزه بتعمله وبتصمم عليه
أنا عاوزك تبص لنفسك لأن حاجة صغيرة بتعوزها وتدخل مزاجك بتعملها ، بص لنفسك وإنت بتعملها هتلاقي فيها نموذج منك إنت نفسك ، إزاي لما تعوز حاجة بتنفذها ، وبتعاند فيها ، يا أخي ما تشغل الكتلة اللي فوق كتفيك ، واللي ما لهاش لزمة إلا في الهايف ، شغلها علشان تعمل حاجة كبيرة ،
إنت عارف المشكلة إيه ؟؟؟؟
الزمن
إنت مستعجل
طب والحل مع الزمن إيه ؟؟؟؟
بسيطة إنزعه من المشكلة تماما .
ده ممكن ؟؟؟
أيوة ممكن
إزاي ؟؟؟؟؟
بص لتفكيرك هتجد إنه مرتبط بالزمن
كل تفكيرك ماشي في خطين
إما الماضي
أو المستقبل
ما هي دي الحماقة
الماضي راح وولى
والمستقبل ما نعرفوش
بتعدي الجسر قبل ما تصل إليه ليه ؟؟؟؟
في الحديث القدسي ما معناه : يا عبدي كما لم أطالبك بعمل غد فلا تطالبني برزق غد
وقف الزمن تماما ، لا ماضي ولا مستقبل ، الزمن هو الآن فقط ، لو أحسنت الآن هترتاح من هم الماضي وقلق المستقبل
طب ممكن حكاية الزمن دي تفيدنا في طموحاتنا المستقبلية ؟؟؟
أيوة ممكن
إزاي يا خويا ؟؟؟
برضوه إنزع الزمن ، تلاقيها اتحلت
مثال عملي :
مش إنت عايز تنجح في الامتحان اللي بعد أسبوع ؟؟؟؟
انزع الزمن
اجلبه للحاضر
خلاص أنا نجحت
استنى يا حبيبي ، ما تدخلش تنام وتقول لي أنا نجحت خلاص
بما إنك نزعت الزمن وجلبته للحاضر يبقى أصبح شيء واقع وحاضر ، ومادام أصبح واقع يبقى يقيني ، وما دام يقيني يبقى تتصرف على اليقين ده
ما دمت أنا ناجح يبقى أحسن اللحظة وهي إني أقعد أذاكر وأنا على يقين إني ناجح
وطبعا كله بإذن الله إحنا بنتكلم على طريقة التفكير
------------------------------------------------------------------
حصلت مشكلة أتعامل معاها إزاي ؟؟
قدر للمشكلة قدرها
لو عاجلة
يبقى تركز في الحل
لو بسيطة
تجاهلها
لو كبيرة بس مش عاجلة
نؤجل التفكير فيها لوقت تكون فيه أكثر استعداد للحل
ونديها وقتها لأن المشكلة بتنزل ومعاها لطف ربنا
انتظر شوية يمكن اللطف جاي في الطريق
-------------------------------------------------------------
لأ يا عم جاجوار ، إنت باين عليك مكلمنجي وبتشتغلنا ، لو الحكاية بالسهولة دي ما كانش حد غلب .
عندك حق تقول كدة ، إنت هتعرف طعم الحلاوة إزاي و إنت مدمن أكل المر
يعني إنت يا عم جاجوار بتاع الحلاوة وإحنا بتوع المر ؟
والله تعالى نشوف والمية تكدب الغطاس .
إنت قاعد دلوقت ، أمام الكبيوتر ، تعرف تقول لي اللي حواليك في الغرفة جن وشياطين ، أم ملائكة ؟؟؟
وإنت ماشي في الشارع ، اللي معاك وحواليك جن وشياطين وإلا ملائكة ؟؟؟
الجواب :
لأ يا عم جاجوار أنا مصلي الحمد لله ومتوضي ، و أكيد اللي حواليا ومعايا في الغرفة وكل مكان ملائكة .
طب بالله عليك اللي حواليه ملائكة وطاهر وفل الفل بيكتب اللي إنت بتكتبه على صفحات المنتدى وبتتحدثه مع الناس ؟؟
اللي قاعد ينعي حظه ، اللي عنده صداع ، اللي عمال يشتم وينتقد ويسخر ويهزأ ويغضب ويعبر عن سخطه وعدم رضاه عن كل شيء ومش فاكر لربه نعمة واحدة يشكره عليها ، بالله ده حواليه ملائكة ؟؟؟ إنت بتضحك عليا وإلا على نفسك ؟؟؟
ألا تعلم يا سيدي أن الملائكة تنفر مما ينفر منه الناس ؟؟؟؟
ألا تعلم أن ما تحويه داخلك ينضح على وجهك ومن حولك ؟؟؟
الرسول قال لنا : ابتسامتك في وجه أخيك صدقة
يامن يدعي تواجد الملائكة معه لماذا عبوسك ؟؟؟؟؟؟
فهمني ، أصل أنا فهمي عل قدي .
هو عبوسك ده هيدخلك الجنة ويرضي ربك عنك ، لعنك لكل شيء و سخطك على كل شيء هل هو الحل ؟؟؟
لا يا عم جاجوا إنت زودتها ، يعني إنت شايف كل حاجة ماشية صح وإحنا اللي غاويين نكد ؟؟؟
لا يا سيدي كله غلط في غلط ، بس إيه هو الغلط أصلا ؟؟؟
ما هو الغلط ده هو أنا و أنت وهذا وذاك وتلك وهؤلاء ،
منين بتدور على السعادة وأنت من دعاة البؤس ؟؟
منين مستني البركة وإنت طاردها من حياتك ؟؟؟
يا أخي تفاءلوا بالخير تجدوه
عاوزين البركة تأهلوا لها
باحثين عن السعادة كونوا من دعاتها
يا أخي لا تمارضوا فتمرضوا فتموتوا
يقولون : إذا أردت أن تتوج كملك ، فتصرف تصرفات الملوك
عمرك شفت شحات بقى غني ؟؟؟؟
ولو اجتمعت عنده كنوز الدنيا ، هو شحات وهيموت شحات ، والواقع يؤكد صدق ذلك
--------------------------------------------------------------------
آخر نصيحة عاوز تبقى سعيد صاحب السعداء ، عاوز تبقي إيجابي لازم الإيجابيين ، عاوز تنجح الزم الناجحين ، عاوز تبقى عالم فخالط العلماء ، المرء على دين خليله فلينظر أحدكم من يخالل
مثل الصاحب الحسن كمثل بائع المسك
ومثل صاحب السوء كنافخ الكير
تعرف تقولي وبكل صراحة إنت بائع مسك أم نافخ كير ؟؟؟
قبل أن تقرأ أي موضوع اقرأ العنوان وشوف يا ترى هيطلع إيجابي أم سلبي ؟؟
فإن لم يتبين لك فاقرأ بضعا من سطوره ، فإن وجدته يحمل معاني سلبية ، فلا تكمل ، لأن كاتبه نافخ كير .
بس اللي بيحصل العكس
المواضيع السلبية هي اللي بتشدنا
فضائح ، كشف زيف كذا ، آخر الأخبار ، مش هي دي العناوين اللي بتشدنا ، إنت 24 ساعة بتشحن نفسك بطاقة سلبية ،
متوقع إيه هيكون شعورك ؟؟؟
بالله عليك وإنت بتفتح الجريدة ، وإنت بتتصفح القنوات الإخبارية أو البرامج التي تناقش مشاكل ، متوقع مثلا إنك هتقوم منشرح الصدر ، نفسك مفتوحة للدنيا ؟؟؟
ما بأقولكش ما تعرفش الدنيا فيها إيه واعتزل الكون ، بس قلل قدر المستطاع من تعرضك للإشعاع السلبي ، فيه ناس في المنتدى لما بيكتبوا حاجة بأجري علشان أقرأ ما كتبوه لأني عارف إني هأنتفع منهم وبيهم ، ممكن أختلف معاهم ، ممكن نتناقش ، بس أنا عارف إن فيهم خير ، و فيه ناس والله مجرد ما أشوف اسمه بأخرج من المنتدى حفاظا على طاقتي ،
الطاقة الإيجابية قوية جدا في تأثيرها ، بس الطاقة السلبية محتاجة لكمية كبيرة جدا من الطاقة الايجابية علشان بس تقدر تعادلها ، وتقدر بخمسة أضعافها ، يعني اللي بيسمع كلمة سلبية محتاج يسمع خمس كلمات إيجابية علشان تمحي أثرها فقط ، يا إخوانا ديننا هو ، يسروا ولا تعسروا ، بشروا ولا تنفروا ، نظفوا أفنيتكم ولا تشبهوا باليهود ، من فرج عن أخيه كربة فرج الله عنه بها كربة يوم القبامة ، طب إيه الموقف لما تكون إنت نفسك كربة لأخيك .
أوقفوا نفث السموم فيمن حولكم ، ولا تركزوا على المشاكل فالتركيز عليها بيجعلها محور حياتكم ، وليس نفث السموم مندرجا تحته من يطلب استشارة أو مساعدة ، فهذا أو هذه إنما هو باحث عن طوق فأعينوه ودلوه ولا تنفروه ، راجعوا أنفسكم ، اللي بيكتب حاجة يتق الله فيها ، من كان يؤمن بالله واليوم الآخر فليقل خيرا أو ليصمت ،
ومن خالف ذلك من منهجية التبشير والتيسير ولم يحجز كلامه الذي لا يرجى منه خير ، وبيحط كلام وبس ، فقد خالف أمر الرسول وما اتبع السنة المحمدية ، حتى وإن كان ممن يرفعون شعار الدعوة ، فوالله ما هكذا كانت دعوة الرسول ولا أصحابه ، تخلقوا بأخلاق المصطفى قبل أن تدعوا تبعيته وتنسبوا أنفسكم لرسالته
وسامحوني لوكنت قلت ما أغضبكم
المواضيع المتشابهه
هتعرف طعم الحلاوة إزاي و إنت مدمن أكل المر!!!
تجنب انه ينقلك الاحباط دة.
.gif)
.gif)
.gif)
العرض العادي
