اعشاب عشب السيد فلفل

[مارينجوس الاول]

(( وحدي في المنزل الي ان يأتي الطبيب ))
((حرق في الجلد))


........ 1// تعريض الحرق للماء الجاري
2// زلال البيض فوق الحرق او قشر البطيخ ( تبريد وترطيب ))

3// شرب عصير البرتقال علشان الصدمه وزياده المناعه
4// الدهان يوميا بعسل النحل ( الاصلي ) او اضافته لاي كريم حروق
( اعاده بناء الجلد// منع التشوهات )
4// عمل قناع من الزبادي والخيار وزيت اللوز مساء 3 مرّه في الاسبوع
((لترطيب وتفتيح لون الجلد ))

5// وضع الطحينه مباشره علي الحرق كدهان علاجي (( مجرّب ومضمون ))

[الشيماء]

ألف شكر دكتور مارينجوس

[مارينجوس الاول]

فاصل اعلاني//
لجمالك سيّدتي....
قناع ترطيب وتلميع للشعر ( كلّ الانواع )
8 حبّات فراوله + معلقه مايونيز كبيره
امزجي المكونات مع بعض وحطّيهم علي الشعر والبسي غطاء الحمّام ....احممممم..
طبعا اقصد غطاء حمّام الشعر البلاستيك...؟؟ وعليه حطّي فوطه سخنه( بعد عصر المياه)
لمدّه 20 دق// لو الفوطه بردت الرجاء اعاده التسخين
وكالعاده .....احنا مش بنرمي حاجه...؟؟ ايوه مظبوط.....؟؟
حاسس انّي سامعكم....؟؟ بتقولو ايه....
((هانضربه في الخلاّط ونعمله عصير ونقدمه لجوزنا المطحون
الّي لفّ علي الفراوله لغايه ملقاها ....؟؟؟))

[مارينجوس الاول]

حلقه// المرأه المجهوله
المرّه دي سمعت زغروطه ودي حركه مشهوره لسيدات المناطق الشعبيّه
يعبّر فيها اللسان عن نفسه وكأنّ حد كان رابطه وفكّ اسره ...؟؟
وتوضع اليد فوق الفمّ علشان تعمل صدي صوت....؟
طبعا كانت امّ زكي العزيزه هي صاحبه الزغروطه لقيتها داخله الصيدليّه
ومعاها حلّه كبيره وشايله الواد المفعوص زكي وهو بيعيّط بس عياط
دمّه خفيف اكيد هو كان بيحاول يقلّد مامته وفي نفس ذات اللحظه يعيّط
فطلع الصوت الغريب ده...؟؟؟
..... خد ياعشب يابني دي حلاوه سبعي ابو زكي
اه ه ه ه طالما قالت سبعها يبقي عشبه لسان الثور جابت فايده
......خد با الهنا والشفا
طبعا كان لازم اخدها لانّ دي عاده في المناطق الشعبيّه ....
انا مستغرب جدا الحاله الاقتصاديه تعتبر معدومه ولكن التحيّه والهديّه واجبه
الناس دي بجدّ فرحّها مش منظره ...!!
فتحت الحلّه ود/ احمد بيبصّ ...لا....ده حاطط وشّه كلّه ...
ايه...ده...؟؟؟ ايه الحيوان العجيب ده....؟؟؟؟
..... ايه ده يامّ زكي...؟؟؟
.... مش عارفه ازّاي....؟؟ ده انت الّي كاتبه....ازّاي متعرفهوش...؟؟
فضلت ابصّ علي الشيئ ده و.....لاااااااااااا مش ممكن يكون هوّ بس هيّ سبقتني وقالت
......ده لسان الثور بس ايه ثور متغذّي بصحيح...ابو زكي
اوّل ماكل راس التور بقي زيّ التور ورجع سبع من تاني
((طبعا هي ّ كده ماستعملتش العلاج وطبعا العامل النفسي هوّ اللّي اشتغل
مع انّي اكّد عليها انّها عشبه وتتجاب من عند العطار وليها فايده بجد حلوه جدا
للّي يستعملها فتره كبيره ))
....شكرا يا ام زكي علي الهديّه
طلعت من الصيدليّه بعد ماعملت دعايه ليها لاتقدّر بمال انا عارف
دلوقتي كلّ الناس هاتدخل الصيدليه مش علشان تاخد دواء لاااا علشان تسأل
فيه ايه...؟؟ الف مبروك....؟؟ مين الّي نجح....؟؟ في حدّ اتجوّز
...... د/ احمد موجود
بصوت هامس خجول سمعت هذا الصوت فالتفتّ اليه لاراها...
نفس المرأه قريبه د/ احمد او الّي قال عنها انّها قريبته. طبعا د/ احمد لمّا
شافني مش طايق شكل لسنه الثور راح واخد الحلّه وطالع بيها علي بيتهم
..... هوّ راح مشوار وجايّ بعد شويّه
اومأت برأسها وشعرت بترددها فقلت
....ايّ خدمه تحبّي اقدمها لكي
زاد تردّدها وعلي وجهها الخجل مع التردد الا انّها قالت
.....سمعت....سمعت انّك عندك خبره كبيره با الاعشاب العلاجيّه
....يعني مش كبيره بس بقدر اساعد لو في استطاعتي
عاد عليها التردد والخجل وهي تقول
.... انا عندي...عندي مشكله ...مشكله كبيره جدا ياتري ممكن تساعدني..
غريبه...؟؟ مشكله وكبيره جدا...؟؟؟
شكلها كده في السنه السابعه الرابعه يعني من 21 الي 28 ممكن تكون في اخرها
والسنه السابعه الرابعه هي مرحله البحث عن الهويّه ..عن الذات
بمعني من انا....؟؟؟ من اكون...؟؟؟ ماذا أريد ...؟؟ ماذا سأفعل
ومع مرور السن فيها تبدأ مرحله البحث عن شريك في المشاعر...ثمّ الشريك في الحياه
السنه السابعه الرابعه هي سنه الاستكشاف والتجربه ثمّ النضج الجسماني
والعاطفي.هي تبدأ با الاعتماد علي الاحساس وتنتهي بنضج عقلي و.....
.......يا دك....!! ايه... جواز ولا طهور....؟؟؟؟؟
منّك لله ياشيماء او ياهناء ...؟؟؟ ايه الكلام الّي بتقليه ده..؟؟
طبعا دخلت الصيدليّه بعد ماسمعت زغروطه ام زكي وطبعا المرأه قريبه د/ احمد
وشّها بقه شبه الكاركاديه ....
...... ها يا دكّ.....!! فرّحنا
...... حاضر هافرّحكم... طبعا كان طهور...؟؟ اقصد خطوبه د/ احمد.
حطت ايدها علي فمّها وطلّعت صوت زيّ العرسه وقالت
.... الف مبروك .... انا كنت عا....؟؟
قاطعتها وقلت
.... من فضلك يا شيماء او ياهناء ..
.....ممكن دقيقه واكون معاكم
التفتّ لقريبه د/ احمد لقيتها بتدّيني ورقه وبتقولّي
.... معلشّي اصلي انا مستعجله ....؟؟ هيّ دي مشكلتي وياريت
تقدر تساعدني بس طالبه منّك حاجه
..... اتفضّلي
....ياريت ماتقولشي لد/ احمد لانّه مش مقتنع نهائي با العلاج با الاعشاب
..... انتي هاتقوليلي منا عارف...!! حاضر مش هاقولّه
غادرت الصيدليّه لاجد الاخت التانيه للي دخلت الاوّل الّي هيّ شيماء او هناء الّي لسّه
باتلخبط فيهم اكيد علاج فيهم جاب فايده يائمّا التخسيس
يائمّّا الحلتيت لزياده الوزن والتأديب....
...... ايه جوازه ولا طهور...؟؟؟
....قديمه ....؟؟ اختك قالتها قابلك...؟؟؟
بصّتلها بغضب وقالت
.....مش مهم ّ احنا عايزينك في مشكله
( ايه يوم المشاكل ده...؟؟ ياربّ استر ...؟؟ ))
..... زميليتنا الّي واقفه برّه دي عندها مشكله....
وطّت صوتها وقالت
..... اسمها الانسه حنفي.....؟؟
.....؟؟؟؟؟؟؟؟؟؟
...... ده طبعا الاسم الّي طالع عليها في المدرسه بسبب كمّيه الشعر
الزائد عندها والّي بيخلّيها تشبه الرجّاله..اسمها الحقيقي سكسكه
....؟؟؟؟؟؟؟؟؟؟
..... المشكله طبعا انّ جسمها حسّاس ضدّ كل انواع كريمات نزع الشعر
حتّي المصّاصه ...قصدي الحلاوه بتستعملها الصبح والشعر يطلع
بلّيل ...
...... طب هيّ كده محتاجه تحليل هرمونات وتعرض نفسها علي
دكتور غدد ده مهمّ ليها
.....يا دك...!! امّال احنا جايينلك ليه ..؟؟ انت الخير والبركه
..... يهناء انا ....
..... انا شيماء يا دك....!!
...... ماشي....انا الخير والبركه بس ده مش اختصاصي لازم دك...!! متخصّص
..... طب شوفلنا شويّه اعشاب كده من صحابك يمكن ينفعو...
.....ماشي خدي عندك شويّه صابون سائل مع حجر بركاني وتفضل تدعك
بحركه دائريّه هاتموّت بصيله الشعره ويتأخّر ظهورها
.....يا دك....!! ده ينفع لينا احنا ...بقولّك اسمها الانسه حنفيييييي
.....ماشي ...شويّه ترمس تنقعيهم لمدّه 6 ساعات وبعد ازاله الشعر تحط المياه بتاعته علي الجلد
يوميا لمدّه 21 يوم
.....ايه 21 يوم .....بقولّك اسمها سكسكه...؟؟؟؟
.....ماشي ....في نبات اسمه (( السفيد اب )) يتمّ طحنه وبعد الحلق يوضع لمدّه ساعه
زيّ ماهوّ كده مطحون وبعدين يغسّل با الماء خلّي بالك اسمه ( سفيد اب ) مش سفن أب
..... مفيش حاجه احسن ....
..... ماشي...بس هاسأل واجيلك.. خلّيكي واقفه هنا شويّه
رحت عند العطار وانا ماشي فتحت الورقه بتاعه قريبه د/ احمد
كانت بتقول انّ مشكلتها كبيره و....اممممممم اررررررامممم... دي مشكلتين
مش واحده... وكبار فعلا....؟؟؟
وصلت عند العطار حبيبي والّي بقي مش بيستغرب من كلامي مع الاعشاب
لاااا وبقي يرحّب بيّ كمان ...اكيد الموضوع فيه مصلحه وأُبيّج
.....صباح الخير يا اعشاب ياحلوين
.....صباح الخير ياعشب
.....عندي ليكم سؤال بسيط وسؤال صعب...
.... ابدأ باالبسيط الاوّل
...... عايز عشبه حلوه كده تزيل الشعر... ها ...فيكم حاجه
(( ايه الصمت المطبق ده امّال السؤال الصعب هايعملو ايه فيه))
..... هو مش ممكن حاجه تؤخّر نمو الشعر وممكن مع طول الاستعمال
توقّف النمو خالص
..... طبعا ممكن ده كده حلو جدا للجنس الناعم
.....انا ممكن اعمل كده
رحت للعشبه الّي اتكلّمت وقلتلها
..... اهلا بيكي ياتري اسم الحلوه ايه
...... انا اسمي بعر الماعز...؟؟
.....ايه ...؟؟ مين....؟؟؟ ليه كده بس...؟؟ ده اسمّك...؟؟ كنتي خبّيه احسن
.... لاااا ده لقبي لانّ الدرنات بتاعتي شبه بعر الماعز
..... طب معندكيش اسم تاني
..... ايوه سعدي الحمار ....
.... ميييين؟؟؟؟؟
.....بلاش خد ده مجصّه او سعّيط...او.....
.....بس ....كفايه .....؟؟؟ ايه ده...؟؟ مالك فرحانه بأسمائك كده ليه...
ده انتي رايحه لواحده اسمها الانسه حنفي او سكسكه ...؟؟
ده لو انا قلتلها اسمك ده ممكن تضربني ...لاااا...دي هاتموّتني
مفيس اسم حلو كده اروح بيه ليها
..... ايوه اسمي نبات ال(( ..................)) وهوّ ده الاسم المتعارف بيه
.....ايوه كده ..هوّ ده الاسم الحلو فعلا ... طب تستعملك ازّاي
..... شوف ياعشب وركّز معايا
هاتاخد 70 جم منّي وتطحنهم جامد جدا او خدني مطحونه جاهزه وخلاص
تحطني في ½ كوب زيت زتون وتخليني انقع فيه لمدّه يومين
وللمستعجله ومعندهاش وقت تغليني غلوتين مع الزيت علي نار هاديه لمدّه ½ ساعه
مع التقليب وبعدين تاخد الخلاصه وتخلّطها علي كريم
.....ايّ نوع كريم ...؟؟
....ايّ نوع مش مهمّ بس تقلّبني فيه كويّس وبعد كلّ نزع شعر
بالطريقه العاديّه
.....يعني ايه ...؟؟
.....يعني هيّ تشيل الشعر بالكريم او با الحلاوه او با المكنه
وبعد كده تدهن بيّ لمدّه 5 ايام متتابعه
.....5 ايّام بعد ازاله الشعر ....مش كتير.....؟؟؟
.....الّي محتاجه الشعر مايطلعش تاني او يطلع قليّل هاتستحمل
...... مفيش كده وصفه مع صحباتك تخلّي الوقت قليّل اصل البنات
اليومين دول معندهومش صبر..
.... ماشي ياعشب ....خد عندك
((انا طبعا + شبّه ( مطحونه) + صبره ( نبات مطحون) + مستكه ))
ويغلي الجميع مع لتر ماء الي ان يتبخّر ويفضل
زيّ العجينه وتسيبها تبرد وتحطّها مع كريم وطبعا تستعملها بعد ازاله الشعر
لمدّه يومين بس
..... شكرا جدا ...
اخذت شويّه منّها وجيت امشي بس لقيت الاعشاب بتنده وتقولّي
..... مقولتش المشكله التانيه ايه
..... اه ه ه ...نسيت ...ركّزو معايا ...
في عميله للصيدليّه عندها مشكلتين الاولي انّها عايزه تجيب اولاد...؟؟؟
يعنّي عايزّه تخلّف وعايزه اعشاب تساعدها علي كده..
المشكله التانيه اصعب بكتير هيّ عايزه
(( ولاسباب خاصّه تتعلّق با الاسره عندها )) انّ المولود يكون....يكون ...ذكر وليس انثي
......ايه ده...؟؟؟ بتقول ايه ياعشب
..... العياذ باالله ...عايزه تتحكّم في جنس المولود
.....لاااا لااا مفيش عندنا ...شوف حاجه تانيه
(( فيه ايه مال الاعشاب اتجنّنت كده ليه.....))
طب لغايه مهدّيهم واتناقش معهم بهدوء حد عرف الاسم الحلو بتاعه
العشبه الّي بتأخّر من نمو الشعر....؟؟؟؟
...............................................................

[الشيماء]

نبات السعد
السعد
Cyperus


نبات عشبي معمر، له ريزوم طويل ورفيع حرشفي تظهر فيه عقد على هيئة انتفاخات معطياً درنات ممتلئة بالمواد الكيمائية.
.يعرف نبات السعد الذي تشتهر به بعض وديان المملكة بعدة اسماء مثل: سعد، سعادي، سعدي الحمار، سعدة زبل المعيز (نظراً لأن درنات الريزوم تشبه بعر الماعز)، سعيط ، مجصة.

يعرف النبات علمياً باسم: cyperus rotundus
الجزء المستخدم من نبات السعد الدرنات الجذرية ذات الرائحة العطرية.

الموطن الاصلي لنبات السعد: ينتشر بشكل طبيعي في اغلب دول العالم، وفي المملكة العربية السعودية ينتشر نبات السعد في اغلب المناطق
المحتويات الكيماوية:تحتوي درنات نبات السعد على زيت ثابت وزيت طيار له رائحة كافورية وطعمه مر اما الريزومات فتحتوي على زيت طيار كما تحتوي الريزومات والدرنات على سكاكر مثل الجلوكوز والفركتوز بالاضافة الى كمية كبيرة من النشاء كمادة ادخارية وكذلك على جلوكوزيدات قلبية وقلويدات ومواد عفصية وفيتامين ج ومواد مرة.

ماذا يقول الطب الحديث عن السعد؟
تعتبر درنات ريزومات نبات السعد مضادة للقيء وطاردة للارياح وله تأثير مهدىء. كما ان مستحضرات الريزوم تستخدم لعلاج اضطرابات الجهاز العظمي والتطبل وكذلك للدوخة والغثيان.كما تستخدم الدرنات لتنظيم العادة الشهرية غير المنتظمة والقلق او الاجهاد وكذلك في حالات التهابات الثدي.. يجب ان لا تزيد الجرعات عن 6الى 9جرامات من الدرنات يومياً. كما يجب حفظه في مكان بارد وبعيداً عن الحشرات.

[مارينجوس الاول]

حلقه // الاعشاب الغضبانه
لم اشاهد غضب الاعشاب من قبل....
لسان التور هاج وماج ...لسان البحر اخيرا اتكلّم بس بغضب
البردقوش مع انّه عارف انّه عشبه نسائيّه الا انه دخل معاهم
حتّي عشبه رجل الحمام الطيّبه الغلبانه كانت عايزه تشوطني
طبعا الدمسيسه فضلت تحدفني بزهورها الصفراء ....
الحلتيت والمحلب والقصومه و.......الكلّ علي كلمه واحده
ان مفيش حاجه اسمها عشبه تأكل وتجيب عيال .....وابدا مفيش
عشبه تأكل وتحدد جنس للمولود...؟؟؟
طبعا فضلت اهدّيهم واخيرا اتفقنا نقعد مع بعض قعده عرب (( ده اذا كان لسّه في عرب بيقعدو
مع بعض )) وانا اقول المعلومات الّي عندي وهمّا يساعدوني....
رحت للعطّار (خليل بزره) وطبعا ده اسم الشهره بتاعه ...
مصر للاسف دائما تجد التهريج والضحك في كلّ شيئ حتّي المصائب
اصبحنا لا نواجهها بالعمل والجدّيه بل اصبحنا نواجهها با الامبالاه والتهريج والنكت
والتريقه علي خلق الله ...؟؟ علي اسمهم علي شكلهم علي اسلوبهم .....!!
ولكن العمل ....ولكن لكلّ مقام مقال ....ولكن الانسان بعمله وتقواه ...لاااا
هذا غير موجود عندنا....المهمّ... عمّ خليل بزره طلبت منّه ابات مع الاعشاب
اليوم وطبعا بعد مجهود للفهم ليه....؟؟ واكيد هوّ مفهمنيش لمّا قولتله
.... اجتماع عمل مع الاعشاب
..... يعني ازّاي ياعشب ....هاتجتمع بيهم ازّاي يعني
..... ياعمّ خليل هانتكلّم مع بعض في امور خاصّه ...انت اقفل عليّ المحلّ
ومتخافشي من حاجه...
فضل يحسبها وطبعا تجاريّا هو فعلا مش فاهم ليه ..؟؟ بس لو رفض طلبي
ممكن ابعت الزباين علي واحد تاني هوّ مش عارف انّي ببعتله مخصوص
لانّ اعشابه نقيّه ودائما بيجيب وبيوفّر كلّ الانواع واسعاره بيراعي فيها الضمير
وده برضه عيب عندنا الناس الكويّسه معندهاش ثقه في نفسها ...؟؟
وطبعا اخيرا وافق ....
رحت الصيدليّه.. مش عارف ليه عمّ خليل واخد الموضوع باستغراب مع انّي
كلّمت بابا وقلتله هبات مع الاعشاب اليوم وهوّ قاليّ انّه هايسهر
يكلّم خلايا تي والليمفوسيت بتوع جهاز المناعه بتاعه ..عادي خالص..؟؟
..... دكتور عايز حاجه للصداع بيجيلي كتير الايام دي
جبتله علاج الصداع ...بصراحه كان المفروض اسأله كاالمعتاد
الصداع فين في الجبهه ولّا من الخلف .... لمّا بيوطّي راسه بيزيد ولّا لا....
الضغط اخباره ايه ..؟ النظر......؟؟ كنت هادّيله العلاج وقولّه لو كان مزمن
هات كزبره خاضره وتعصرها في الخلّاط وتصفّي المياه بتاعتها وتقطّر
في الانف اوّل ماتحسّ با الصداع ... وممكن تمسح الجبين با الخلّ
وممكن تعمل حجامه علي الجبين عند واحد متخصّص...الخوخ اكله كويّس
وشراب النعناع .....كل ده بيخفف من فترات الصداع المزمن مع العلاج
وكنت هانصحه يشمّ بزور الريحان جميله ومفعولها فوري....
كنت مشغول بموضوع قريبه د/ احمد والسؤال بتاعها ...؟؟
كنت باسأل نفسي اذا كانت الاعشاب تؤكّد انّ مفيش حاجه عندها تساعد علي كده..؟؟
وطبعا هيّ والحمد لله لسّه ماتعدتش من عاده الكذب او عاده الفشر الّي عندنا..
يعني مفيش حلّ...؟؟ لاا...اكيد فيه ...؟؟ انا فاكر لمّا كنت
بذاكر في مفاتيح الدنيا قريت انّ في حاجه زيّ كده ....؟؟
ومفاتيح الدنيا جدّي فلفل علّمها لبابا وعلّمهالي وهيّ ببساطه زيّ مقال جدّي
(( ياعشب ياابن ابني الغالي ...
كلّ حاجه ربنا خلقها ليها مفتاح يسهّلك الدخول ليها ...حتّي الانسان
لو عرفت مفتاح شخصيّته هاتعرف تدخلّه وتتعامل معاه بسهوله..
الدنيا ليها 3 مفاتيح مهمّين جدا
المفتاح الاول// هوّ حفظ القران او قرائته اليوميّه ولو حتّي سطر واحد
ومعاه قرايه السيره النبويّه وتفسير القران الكريم مهمّ جدا جدا
المفتاح الثاني// اللغه ...
تعلّم لغات البشر من حولك لتستفيد من علمهم ولتأمن شرّهم
اهمّ لغتين لازم تتعلّمهم هما
1// اللغه العالميّه
وهي في زمنك هذا الانجليزيّه
2// لغه عدوّك
وهي في زمنك هذا اللغه العبريّه
متقولش مش مهمّين ولا هاستفاد منهم ايه لااا هاييجي الوقت الّي هاينفعوك فيه
المفتاح الثالث هو// اختراع العصر
لازم تعرف ايه هوّ اهمّ اختراع في عصرك والي بيُبني عليه باقي الاختراعات
وفي عصرك ده اسمه // الكمبيوتر
(( القران وتفسيره// اللغه الانجليزيه والعبريّه// الكمبيوتر ))
صدقت ياجدّي العزيز هذه هي مفاتيح عصرنا و..
......دكتور ...العلاج غالي والشراب مش نافع والكحّه مغلباني...اعمل ايه
كان عمّ خميس بتاع العرقسوس قلتله
..... شراب ايه يا عمّ خميس...وعلاج ايه....وكحّه ايه...انت عجّزت ولا ايه
..... علاج الدوالي د/ احمد ادّاني علاج دهان وحبوب وفيتامين وبعد كده
قالّي لازم تلبس شراب دوالي وتشرب شراب للكحّه انا خايف اكون عكست
الشرابات مع بعض...؟؟
.... انت رحت لدكتور وكشفت يا عم خميس
....لااا...انا جيت علي هنا علطول...
كا العاده د/ احمد مش بيسيب حاله الا ولازم يدّيلها علاج ...
الفرق بيني وبينه انا بهتمّ بعلاج المريض وهوّ بيهتمّ بجيب المريض
..... ياعمّ خميس ممكن اشوف الدوالي دي..
بعد شويه كام كحّه وراني رجله من الخلف تحت الركبه وكان في فعلا
بعض العروق النافره ( البارزه ) ولكن بنسبه بسيطه
..... ياعمّ خميس العلاج كويّس بس الدوالي محتاجه مع العلاج راحه وانت بتلفّ
با العرقسوس طول اليوم وكمان عند النوم حطّ رجلك علي مخدّه عاليه
ولازم التدليك اليومي بزيت زتون علي العروق الّي نافره دي
.... يا عشب يابني انت عارف انّ العيشه غاليه وانا معرفشي غير مهنتي دي بس
اذا مالفّتش طول اليوم العيال ولادي ياكلو منين...؟؟
.... طب اتفضّل اجلس ياعم خميس وارفع رجلك علي الكرسي التاني
لغايه مجيبلك حاجه تساعد علي العلاج....
سيبته ورحت للاعشاب وانا بقول في نفسي
(( علاج الدوالي في الاعشاب بالنسبه لي قليّل جدا ممكن يستعمل الخلّ المكّز
( الخلّ العادي بس بدون تخفيف ) دهان علي الدوالي وممكن يحطّ
رجله في ماء دافيئ عليه خردل ...
يعني معلقه من الخردل وممكن مسترده ( علي حسب علمي كلّها خردل)
ويغسل الدوالي بيها او يعملها ككمّادات عليها ....
امراض الجهاز الدوري ومنها الدوالي معلوماتي فيها قلّيله فعلا...لازم اسأل الاعشاب
......صباح الخير يا اعشاب ياحلوين
(مفيش ردّ)
.... طب ليه الزعل ده منا قولت هاجيلكم با الليل ونتفاهم مع بعض
.....ماشي ياعشب طلباتك ايه
..... شكرا ياحبّ البركه يابتاعه علاج كلّ حاجه وربّنا يطرح فيكي البركه
انا سؤالي بسيط علاج للدوالي ولو ينفع كمان للكحّه الناشفه يبقي كويّس اوي
لانّ المريض غلبان جدا...
...... ممكن تاخدني انا للكحّه الناشفه
.... وانا كمان
....وانا.....وانا......وانا.....
....كفايه....مين انتم با الظبط وكلّ ده علاج للكحّه
... انا العرقسوس معلقه منّي وعليّ ماء مغلي مرّتين في اليوم
.... انا بزر الكتّان معلقه منيّ وتغلي مع ¼ لتر ماء ل3 دقائق وتشرب مرّّه واحده يوميا مساء
..... انا ورق الجوافه اشهر علاج للكحّه
....انا الشمر....انا الحلبه ...انا اوراق البنفسج .....انا الجرجير اعصرني واشربني معلقه كبيره 3
3 مرات .....انا لسان الحمل...انا...ح...
....كفايه....ماشاء الله كل ده بيعالج الكحّه....
..... انا ح.....
.....خلاص بقي ...انا عرفت بس انا عايز علاج للدوالي و
......انا....اسمعني من فضلك...
....اتفضّلي
..... انا بعالج السعال وممكن اعالج دوالي الساق بس مش اقلّ من شهر
.....ياه اهو انتي الّي انا عايزك اسم الكريمه ايه ...ولو رتبتك كمان يبقي عسل
...... انا (....................) ومش لازم تعرف رتبتي بس
انا جايّه من اوروبا وشمال اسيا واحيانا بروح امريكا الشماليّه
.... ماشي طب نستعمل الزهور بتاعتك ولاّ ولا....ايه ده...؟؟ فين الاوراق بتاعتك
هو انتي زهور بس ولا ايه.......؟؟؟
..... لااا اصل انا زهرتي الصفراء مش ايّ زهره انا غير كل النباتات
انا الزهور بتطلع الاول وبعد كده الورق
.....شيئ غريب فعلا بس نستعملك ازاّي
..... با النسبه ليّ الاوراق احسن وياريت تستنّي وتاخد ورقي ...
شوف ياعم لو للكحّه 3 معالق صغيره وتحطّ الماء المغلي عليّ
وتغطيني 10 دقائق وتشربني 3 مرّات
وبا النسبه لدوالي الساق تاخد ورقه ورور ياعني طازه خضره كده حلوه
وتلفّ بيّ علي الدوالي وتربطني يوميّا ولو مفيش ورق ورور خد ورقه ناشفه
بس بخّني بشويّه ماء بس بفكّرك النتيجه حلوه بس المتابعه ...
..... يعني بعد ادّ ايه بنلاقي نتيجه
..... الالم بيروح خلال الاسبوع الاول وبعد شهر هاتلاقي العروق بدأت تصغر
استعملني كتير وبصوره دائمه وهاتلاقي نتيجه حلوه بأذن الله
..... ماشي
.....مستنياك باالليل اوعي ماتجيش يابتاع تحديد جنس المولود
..... ماشي يابتاعه الدوالي جايلك.....
رحت الصيدليّه لقيت عم خميس نام من كترالتعب علي الكرسي
فضلت ابصّ ليه واسأل نفسي
(ياتري مفيش عشبه كده تخلّي الواحد غني ويبعد الفقر عن طريقه..))
تذكّرت المقوله الي بتقول (( لو كان الفقر رجلا لقتلته ))
مش عارف ليه مقالش امرأه مكان رجلا...؟؟ دايما الرجّاله هي الّي بتموت..
المهم.....
ياتري حدّ عرف عشبه السعال والدوالي دي ايه....؟؟؟

[مارينجوس الاول]

لقاء مع الاعشاب//1

طبعا بعد ماعمّ خليل بزره صاحب العطاره وافق انّي ابات مع الاعشاب
هوّ صمّم يحضر الاجتماع وطبعا انا قلتله موافق واوّل مادخل طبعا الاعشاب بتحسبه انا
وفين يوجعك ....
الدمسيسه المجنونه رمته بزهورها الصفرا...نبات اللبلاب
بتاع الكحّه والبلغم كعبله بسيقانه الطويله وحجر اليهود بتاع
تزويب حصوات الكلي فضل يتحدّف عليه ... مخالب الشيطان بتاع
المفاصل والروماتزم طلعله وخلاه يجري ويقول
.... اعوذ با الله من الشيطان الرجيم ....المحلّ مسكون با الجنّ والعفاريت
رديت عليه وقلتله
.... منا قلتلك الموضوع كبير ,,, ابقي احرق شويّه بخور
وحطّ عليهم شويّه صمغ الحلتيت علشان يطرد الجنّ والعفاريت
فضلت اضحك وانا داخل المحلّ وبقول
..... مساء الخير يا اعشاب ياحلوين مش كفايه كده...بقي دي مقابله
ردّ عليّ الشيح ...
..... احنا مش عايزين نشوفك يابتاع الكلام الفاضي
...... ياشيح ....
انت فاكرني دوده من الدود الّي بتطردهم من الجسم ولّا فاكرني
حيوان زاحف تعبان مثلا وهاخاف اقرّب منّك لااااا....اسمعني الاوّل..
.....ماشي ...هانبقي اكرم منّك اتفضّل اقعد
لقيت ورق اليقطين الكبير بيفرد نفسه علشان اقعد عليه
....شكرا ياورقه اليقطين يالّي بتعالجي الحروق رحمتيني من القاعده علي الارض
لقيت الشيح بيقول
....انت ماسمعتش قول الله تعالي
(( يهب لمن يشاء اناثا ويهب لمن يشاء الذكور او ييزوجهم ذكرانا وإناثاً ويجعل من يشاءعقيماإنه عليم قدير))
ازّاي تيجي انت وتقول انّك ممكن تحدّد جنس المولود....؟؟؟
.....شوف يا عم الشيح ...؟؟
انا مقولتش هاحدّد انا بقول هاخد با الاسباب واساعد لو في طريقه وكمان
مشيئه الله واقعه في النهايه ... ياعني مثلا الدكاتره
الّي بتحاول المساعده في علاج العقم هل هيّ بتخالف مشيئه الله تعالي ولا بتاخد با الاسباب
...... طب انا سألت الاعشاب كلّها وملقتش واحده تنفع
.....ياعمّ الشيح انت سألت عن اعشاب لتحديد جنس المولود وطبعا مفيش
لانّ السؤال با الطريقه دي غلط
..... طب السؤال ازّاي ياعم السرخس سمّعنا
(( يعني ملقاش غير النبات السامّ ده ...ماشي ياشيح....))
..... لعلمك السرخس الّي شبّهتني بيه مع انّه سام عند الاكل بس
بينفع جدا جدا لالام العضلات لمّا يتحطّ مباشره عليها وكل الّي عندهم
لومباجو والام اسفل الظهر بيستعملوه زيّ اللزقه ....فاهمني يابتاع ياطارد الديدان
علي العموم اسمعني واسمعوني كلّكم
(( انجاب الولد عندنا لازم من زوج وزوجه يعني ذكر وانثي والموضوع
عندنا صعب شويّه مش زيّ عندكم كده موضوع التكاثر سهل. عندنا لازم
يكون في قبول وبعدين بتخشّ علي الشقّه والعفش والقايمه
والفرح وحماتك يعني ولا تقولي اعشاب لسان التور بتاعه الشجاعه
هاتنفع في كلّ ده...
..... متنساش الحبّ كمان ياعشب
.... ماشي ياقرنفل ....مانت زهرتك بتاعه العشّاق فعلا حتّي حبوبك
بتسكّن الام الاسنان واللثّه الّي اتهرو من كتر الكلام ...
المهمّ... الرجل بعد ماتطلع عينه ويتجوّز لازم علشان يحصل حمل تكون
قدراته الجسديّه والذهنيّه والنفسيّه عال العال
والجسديّه مهمّه جدا جدا و الزوجه كمان لازم تهيّئ جسدها لاستقبال الجنين
..... تقصد ايه بتهيئه الجسد دي ...؟؟
..... يعني ميكونشي في موانع عندها ولا عنده مثلا امراض لاقدّر الله وكمان
الابتعاد بقدر الامكان عن الضغوط الحياتيّه ( القلق والانفعال والارهاق والرغبه في الانجاب
بصوره سريعه او مرضيّه ) والزوجه تهتمّ بتنظفه منطقه الرحم بطريقه معتدله وتكون
خارجيّه اكثر من الداخليّه حتّي لا تؤثّر علي الخصوبه ...وكمان التغزيه مهمّه جدا
الزوج يبتعد عن التدخين والكحوليّات طبعا ولبس الملابس الضيّقه و
.... ايه ده هيّ الملابس بتأثّر كمان
..... ايوه ياورق الزيزفون لانّها بتتغط علي المناطق التناسليّه
خاصّه عند الرجل وبترفع درجه الحراره
......اه...كده بقي لازم تشربني منا بنزّل درجه الحراره وبعرّق الجسم كمان
.... ايوه يازيزفونه .....وكمان يبتعدو عن التلوّث وان كان ده صعب لانّ بلدنا التلوّث بقي عامل
زيّ الشريك الّي مصاحب الواحد في كلّ مكان يعني ولا الفراوله الّي بتنقي
الجسم من السموم ولا الشاي الاخضر المضاد للاكسده هاينفعو مع التلوّث بتاعنا
المهمّ...كلّ ده تهيئه للجسم علشان يحدث الحمل و ....
..... ياعني مجبتش سيره جنس المولود
.... حاضر ياعمّ الشيح اصبر...
المسئول عن الاخصاب في الرجل هوّ الحيوان المنوي وده نوعين عند الرجل واحد شايل علي
راسه حرف
وده بيبقي مبطرخ شويه وحركته قليّله وراسه عريضه شبه بيضاويّه وقدرته علي الصمود عاليx
والتاني شايل حرفد
ووزنه اخفّ وسرعته عاليه وراسه مستديره y
والاثنين بيعيشو من 3 الي 4 ايام داخل منطقه الانتظار عند المرأه والمسمّاه
بمنطقه (الماده المخاطيّه الرحميّه) وعددهم حوالي 300 مليون بس الّي بيوصل
لمنطقه الانتظار بيبقي قليّل يعني كام 100 كده والّي بيقدر يعدّي
منطقه الانتظار كام واحد فقط لاغير
..... ياعين امّهم من 300 مليون الي عدد كام واحد ....؟؟؟
..... ايوه يا سفرجل... ياعني انت بتستعمل لتنشيط الرغبه والقدره الجنسيّه عند الذكور
علشان يطلّعو 300 مليون تروح الانثي تقضي عليهم وتسيب عشره كده ولّا اقلّ كمان
..... هيّ الانثي عندكم مالها قويّه كده ليه عايزه تقضي
علي جنس الرجّاله جوّه وبرّه
..... وساعات بتقطّعهم وتحطّهم في اكياس والجيل الجديد بيعقدوهم فينتحرو
بس الوضع مختلف في الداخل لازم عدد حيوان منوي واحد فقط هوّ الّي تسمحله
با التلقيح علشان بيكون الاقوي والافضل لانتاج ولد سليم ..
..... بردو ماقلتش حاتحدّد ازّاي...؟؟؟
..... ياعمّ الشيح منا بقول معلومات علشان التحديد اهي ....اصبر للنهايه و....
...... عشب....عشب انت لسّه عايش ...؟؟
سمعت صوت عمّ خليل بزره وهوّ بينده من برّه
.... عشب يابني الفجر قرّب يدّن..... لو بسم الله الحفيظ بعدو عنّك افتح وتعالي...
قلت للاعشاب
..... نكمّل بكره ان شاء الله
..... مستنّيينك ...؟؟؟
فتحت لعم خليل بزره والّي فضل يشبّ براسه ويبصّ علي الاعشاب فقلتله
.... متخفش ياعمّ خليل دول هديو خلاص وهاينامو..!!
.....؟؟؟؟؟؟؟
..... متبصّيليش بستغراب كده انا هاكمّل معاهم بكره لانّ الشيح تاعبني اوي
....؟؟؟؟؟
لقيت بابا السيّد نازل من البيت فقولتله
..... ايه يابابا خلّصت كلامك مع التي سيل والليمفوسيت بتوع جسمك
.... ايوه وعرّفوني علي خلايا جديده كمان اسمها الفاجوسيت بتبلع ايّ حاجه مش متعرّفه
وبكره هاكلّم جزر لانجرهانز لحن تعبانه شويّه
...... اه ....يابابا خلّي بالك دي بتاعه الانسولين يعني بتاعه امراض السكّر بعد الشرّ عليك
يعني ممكن تاخدلهم بصل او ثوم او حلبه حلوين جدا للسكّر نوع 1 و2
..... ايه ياعشب مفيش حاجه يعني من غير ريحه
.... في طبعا حبّ العزيز 3جم صباحا ومساء وفي الحرنكش وورق الفراوله تصبّ عليه
ماء ساخن ويشرب بعد الاكل يحرق 30% من السكّر
..... شكرا يابني ... متنساش الجمعه الجايه هاتخرج مع جدّك عازمك علي حفله في قصر
الملك امون- حتب الرابع الّي مشهور بأسم اخن- أتون او اخناتون
...... اه ه ه ... هوّ لقي عالم موازي للفراعنه ماشي...؟؟ اهو نتعرّف علي الاعشاب بتاعتهم
با المرّه ..و ....
..... لا حول الله.... الواد وابوه اتجنّنو....لااااا... دول اتلبسو والعياذ بالله...؟؟؟
..... مالك ياعمّ خليل.....؟؟؟ طب استنّي بتجري ليه...؟؟؟؟
ايه ده...؟؟ ايه الّي غريب قولناه ..؟؟ حدّ شايف ايّ كلام غريب...؟؟
..................................

[الشيماء]

المشاركة الأصلية كتبت بواسطة مارينجوس الاول

..... مالك ياعمّ خليل.....؟؟؟ طب استنّي بتجري ليه...؟؟؟؟
ايه ده...؟؟ ايه الّي غريب قولناه ..؟؟ حدّ شايف ايّ كلام غريب...؟؟
..................................

لالا
لاسمح الله
مفيش كلام غريب
خااااااااااااااااااااااااااااالص

[shemois]

المشاركة الأصلية كتبت بواسطة مارينجوس الاول

فاصل اعلاني//
لجمالك سيّدتي....
قناع ترطيب وتلميع للشعر ( كلّ الانواع )
8 حبّات فراوله + معلقه مايونيز كبيره
امزجي المكونات مع بعض وحطّيهم علي الشعر والبسي غطاء الحمّام ....احممممم..
طبعا اقصد غطاء حمّام الشعر البلاستيك...؟؟ وعليه حطّي فوطه سخنه( بعد عصر المياه)
لمدّه 20 دق// لو الفوطه بردت الرجاء اعاده التسخين
وكالعاده .....احنا مش بنرمي حاجه...؟؟ ايوه مظبوط.....؟؟
حاسس انّي سامعكم....؟؟ بتقولو ايه....
((هانضربه في الخلاّط ونعمله عصير ونقدمه لجوزنا المطحون
الّي لفّ علي الفراوله لغايه ملقاها ....؟؟؟))

شكرا يا دكتور على الخلطه التحفه دى
بس على فكره احنا ممكن نوفر الفراوله وناكلها
المايونيز الوحده بيقوم بالواجب وبيعمل نتايج تحفه بس تسيبه على الشعر ساعه مش 20 دقيقه
واسال مجرب

[shemois]

والله يا دكتور انا ابديت احس انى بقرا قصه من قصص ما وراء الطبيعه
حضرتك متاكد انك ما تقربش لدكتور رفعت اسماعيل
بس مع كل ده احنا متابعين معاك

[مارينجوس الاول]

لالا
لاسمح الله
مفيش كلام غريب
خااااااااااااااااااااااااااااالص

ايه الغريب في كلام اب وابنه.... امّال لما يخرج
مع جدّه وارض الفراعنه هاتقولي ايه ولّا مع نبات الموكا وشعب المايا ....؟؟
ولّا مع حيوان اللايجر المفترس وغابات الامازون المطيره ....لا استعدّي يادكتورتنا العزيزه
للكلام الغريب بجدّ....

[مارينجوس الاول]

د/ شموس
فعلا المايونيز لوحده بيرطّب الشعر ويلمّعه والفراوله كمان بتساعد
علي كده ومتنسيش الفيتامينات الكتيره الّي هاتاخدها بصيله الشعره
من الفراوله ...ولا انتي نفسك في الفراوله وعايزه تاكليها
بس متنسيش الّي اشتراها سيبيله قطعه....

[مارينجوس الاول]

د/ شموس
فكرتيني بقصص ماوراء الطبيعه ود/ رفعت اسماعيل وماجي
(( طبعا اقصد حبيبته القديمه مش شربه ماجي) ...
الرائع د/ احمد خالد توفيق ده بحر من العلم في كلّ حاجه
باين كده اتأثرت بكتاباته وانا مش واخد بالي....
اشكركي جدا جدا علي الاطراء واشكركي علي مشاركتك الجميله
ولو عندك ايّ خلطه اخري للشعر او غيره ياريت تكتبيها
وده كان هدف من اهداف هذه القصّه ان نتشارك للعوده الي الطبيعه...
علي فكره كلام في سرّك باين كده د/ رفعت اسماعيل
يقربلنا افتكر انّي شوفته وهو بيتهاجم من عشبه اكله لحوم اسمها
النبنيتس Nepenthes


وواحد غلس واقف جمبه بيقوله
(( انا بك اسعد وقلبي بك يطرب )).....؟؟؟؟

[shemois]

المشاركة الأصلية كتبت بواسطة مارينجوس [size=5

علي فكره كلام في سرّك باين كده د/ رفعت اسماعيل [/size]
يقربلنا افتكر انّي شوفته وهو بيتهاجم من عشبه اكله لحوم اسمها
النبنيتس nepenthes


وواحد غلس واقف جمبه بيقوله
(( انا بك اسعد وقلبي بك يطرب )).....؟؟؟؟

شفت يا دكتور مش قلتلك انا كان قلبى حاسس
اما بالنسبه للخلطات اكيد عندى وان شاء الله انزلكم خلطات مجرباها بنفسى

[مارينجوس الاول]

اجابه السؤال السابق هو عشبه حشيشه السعال
واسيبكم مع معلومات عن العشبه
(( حشيشه السعال نبات معمّر من الفصيله المركّبه تحتوي علي
مواد دابغه وصابونيات وموطنه الاصلي اوروبا وشمال افريقيا
تستعمل الازهار كمستحلب او مغليه لعلاج البرد او السعال وتستعمل الاوراق
الضازجه كدماضه لدوالي الساق والقرح وبعض انواع الطفح الجلدي
ويمكن استعمال الاوراق الجافه بعد ترطيبها
لنفس الغرض.قديما كانو يقطعون الاوراق واستعمالها
مكان التبغ داخل السيجار لعلاج السعال

[الشيماء]

شكرا للإجابة يا دكتورنا
عذرا علي تقصيرنا
ربنا يباركلنا في حضرتك يارب

[مارينجوس الاول]

المشاركة الأصلية كتبت بواسطة الشيماء

شكرا للإجابة يا دكتورنا
لا شكر علي واجب
عذرا علي تقصيرنا
تقصير ايه بس....ده انتي عامله الواجب وزياده
ربنا يباركلنا في حضرتك يارب

ويباركلنا فيكي وفي كلّ اعضاء المنتدي الكرام

[مارينجوس الاول]

لجمالك سيدتي
لكلّ من تشتكي من تساقط الشعر..... بسبب جوزها
لكل من يتساقط شعرها بسبب عصبيّتها الزايده..... والسبب جوزها
لكل من تشتكي من تقصّف الشعر وتساقطه بسبب عدم نومها لانّ جوزها شخيره عالي جدا
لكل زوج شعره وقع وتساقط لانّه مش عارف يوفّر تمن علاج لاحدي زوجاته السابقات
ماسك الشعر //
مجموعه من كلّ الزيوت اللي عندك
(( خروع/صبار/زتون/سمسم/الوز/عباد الشمس/....)) بكميّات متساويه+2 مع زبادي
+ 1 مع مايونيز + 1 مع عسل نحل+ 1 صفار بيضه
يخلط الجميع ويفرد علي الشعر مع غطاء الرأس لمدّه 2 ساعه مرّه واحده اسبوعيا))
ويفضّل يوم اجازه جوزك علشان يشوف ادّ ايه انتي تعبانه علشانه
طبعا متنسيش بعد ماتخلّصيه حطّي شويّه زيت سمك او زيت عربيات
وقدميه لجوزك علشان يقع شويّه الشعر الباقييييييييييييييين عنده...؟؟؟

[اميره صالح]

بجدّ القصص دي رائعه
والاستفاده كبيره بس انا عندي سؤال ايه التقويم السبعاوي ده
يعني مرتبط ببلد ولا ده من افكارك لانّه بجد متطابق معايا تماما
وسؤال تاني مفيش حاجه عشبيّه كده واقي شمس علشان الصيف

[مارينجوس الاول]

د/ اميره
شكرا جدا علي اعجابك با القصّه واتمنّي ان تكون دائما هكذا....
سؤالك الاول عن التقويم السبعاوي ده مش تقويم با المعني المعروف هو اقرب
لدراسه نفسيه لمراحل عمريه معيّنه مدّتها سبع سنوات من عمر الانسان
الدراسه للكاتب الرائع (( جون جراي )) وعجبتني جدا فحبّيت انقلها ليكم
طبعا من خلال القصّه والاطار الادبي والدراسه شامله عدد
10 مراحل عمريه في كتابه
how to get what you want and want what you have
اسم كبير بس الكتاب رائع ....
السؤال الثاني في
1/ ماء الرز تحطيه في بخّاخه وتبخّيه علي الاماكن الّي هاتتعرّض للشمس
قبل النزول بربع ساعه
2// الدهان بقشر البرتقال ( التمسيح بالقشره البرتقاليه )
3// زيت جنين القمح دهان بيعمل طبقه حمايه وكمان مضاد للاكسده كويس